Sukkelao, lekker zeupie en eerappels……

AA EN HUNZE - Sukkelao, lekker zeupie en eerappels, dizze en veul meer Drèentse woorden kuj lezen bij een aantal speciaolzaoken in Aa en Hunze. 

Naomen van preducten of mooie zinnegies in het dialect bint te vinden in Annen en Raol  bij de Echte Bakker Pots, Martens Groente- en Fruitspeciaalzaak, Hagels, Uw groeteman en Slijterij Pinotage. ,,Juust in dizze Coronatied is het mooi dat de winkeliers ‘Wies met Drèents’ under de aandacht wilt brengen”, aldus streektaolambassadeur Janny Bruins.  

Eènd jannewaori startte het Huus van de Taol de provinciaole actie met beurtbalkies in de supermarkten in Drenthe. ,,Dit initiatief is slim positief ontvangen. Dik dartig winkels doet hieran met. Um de streektaol op nóg meer plekken under de aandacht te brengen, bint de vrijwilligers oet Aa en Hunze de boer op gaon. An bakker, greunteboer en slieter vreugen we of zij Drèents in heur winkels wollen laoten zeen. Hierop reageerden ze almaol positief”, adus Bruins.

 ,,Aj nou binnenkört in de genuumde winkels binnenloopt, ontkoj der niet an daj preducten met naomen tegenkomt as gebakkies, taort, siepels, eerbeien, praotwaoter, jonge klaore en meer van zukswat. Het wordt arg waardeerd deur de streektaolvrijwilligers van het Huus van de Taol in Aa en Hunze dat de undernemers op dizze wieze het enige levendige culturele arfgood under de mèensen kunt brengen. In de winkels kan der mooie praoterij over ontstaon.”