Jan Hartlief: ‘EHBD Bie de Lidl

21 december 2022, 12:00 Voorlezen Algemeen

GIETEN - Supermarktketen Lidl hef as reclaomeconcept de Lidl-flat introduceerd. De hoofdrollen van de flatbewoners Teun en Kevin wordt invuld deur Thomas Acda en Sergio IJssel. Nao een lange reeks van spots verlat Thomas Acda de Lidl-flat. Zien hoes wordt overnummen deur de homosexuele Freek (Alex Klaasen). Freek komt oet Drenthe. Klaasen, die een paor jaor in Drenthe woont hef, döt een poging um met een heurbaore Drentse tongval te spreken. Nao de eerste oetzending van de spot brast de kritiek lös over de manier waorop de streektaol oetvoerd wordt. Streektaolambassadeur Jan Hartlief stek de helpende haand toe.

Ik word beld deur Renate met de vraog of ik twee daogen vrij kan maoken. Ze vertelt me dat ze veur een reclaomefilmpie van Lidl een taolcoach neudig bint. Ik begriep dat der wat commotie ontstaon is deur de reclaomefilm van Lidl waorin Freek (Alex Klaassen) Drents prat. Maor Renate maokt me dudelijk dat het verzuuk van het reclaomebureau Joe-public daor lös van stiet. Dit liekt me wel weer een oetdaoging, die’k niet oet de weg gao. Op woensdag rie’k met een goedegvulde koffer naor mien hotel in Bussum.

Ik moet dunderdag um 7 uur op ’t appèl. Helaas gien ontbijt, maor gelukkig stiet der genog op de filmlocatie.

Wat een goed gevuul metien, want de ontvangst is allerhartelijkst. Met een plak stoet en een kop koffie in de haand, wor’k an hiel veul mensen veursteld, te veul um alle naomen te ontholden. Maor de beide daogen word ik prima ‘ín de gaoten’ holden deur Noëlle Wgman (dunderdag) en Fiona Jakob.

Ik bin totaol flabbergasted en diep under de indruk van alles wa’k (hiel veul veur het eerst) metmaok. Allereerst die vrachtauto’s, bedriefswaogens die boeten veur de deur staot. Dan aal die mensen, die mij allemaol vrundelik begroet, maor liefst 47 metwarkers staot der op papier, maor volgens mij warkt der nog veul meer met. En de opnaomestudio, een ruumte van ongeveer 10 bij 10 meter, waarin ze alle shots opnimt. En aal die neie woorden die’k bijleer, niks gien Drents, maor ik kan zo een Engelse quiz in mekaor zetten met woorden as crewcall, callsheet, prep, clean shots, shoots, park travel, pack and travel allewel de lésten meer te maoken hebt met de tweede locaotie in het park waor we ok opnaomes maokt.

Toch wel spannend wat ze van mij verwacht. Ik mark bij mien eerste inzet, dat de acteurs (meer as ien, dat verklap ik toch maor) zenuwachtiger bint as ik en het veural spannend vindt um Drentse woorden te gebruken.

Kost’n komt der foutloos oet. Woorden as uutdrukk’n wordt al gauw uitdrukk’n of uutdrukken. Maor nao een shoot of tien (vaoker meer!) stiet de scene derop en is iederien bliede. Ik wordt overlaoden met scholderkloppies, dat vuult goed, daor wil’k wel meer van.

 En ik kan je verklappen, da’k daor zat van had heb. 

Mien vertrouwen dat het allemaol goed zul kommen gruit en het coachen giet me aal beter of. De acteurs wordt ok makkelijker um te coachen, regelmaotig word ik op de set roepen um dingen te veraandern. Het giet der de hiele dag professioneel an toe. 

Een hiel team zit met te kieken en luustern naor de opnames en der ontgiet heur eigenlijk niks. As ik denk dat het hielemaol goed is zeg een aander, dat der argens een laamp miste of een bord verkeerd stiet.. 

Der ontstiet soms discussie over mien opmarkings over de Drentse woorden/oetdrukking/uutdrukking’n) Het wordt mij dudelijk dat het Drents zo oetspreuken mot worden, dat het in hiel Nederland begriepelijk is. Een mooi veurbeeld is het Drents veur “moesten”. Muss’n zeg wij dan, maor de crew wil liever moest’n, want een mus is een vogel. Weer een stukkie dudelijkheid.

De dunderdag is een lange dag. Bij elke scène mot het decor anpast worden en dan mussen (niet moest’n! ) wij soms een half uur tot dree kwarteer wachten. Alle tied um tussendeur even met Jan en alleman in gesprek en veul kennis op te doen. En iederien was even vrundelijk en bereid um dingen oet te leggen. Al met al waren wij ’s aovend tegen kwart over 8 deur het programma.

Op vrijdag huufde ik der pas um kwart over 11 wezen. Eerst de scenes in de studio aofronden en daornao op pad naor het veldtie waor men hard warkt had um een mooie kerstsfeer te maoken. Daor waren wij tot kwart over 9 drok met de belscenen Tussentied vrugen ze mij wel een paor maol of ik nog wel naor hoes wol rieden of dat ze toch nog een een hotel mussen boeken. 

Ik heb veur het lèste keuzen, zoda’k underweg nog es alles kun overdenken en vanof Zwolle tot an de veurdeur mien prachtige ervaorings met mien vrouw kun delen via de tillefoon. 

Overdenkend kreeg ik een positief gevuul over mien rol. Hopelijk wordt dat zichtbaor nao de montage bij de reclaomebeelden en zie’k mien coachingsresultaoten terug. Maor daorop moe’k wachten tot argens in december.

Toen de montage klaor was hew nog vaaok feedback muggen geven op de opnaomes.

Ik was zenuwachtiger over het eindresultaot dan ik was tiedens mien coaching! Gelukkig is het goed lukt en he’k positieve reacties had. Ok wel negatieve, maor daor zu’k geern nog es een maol op willen regeren. Zoas “ze praot giens Drents”, dat klopt, maor je moet wel kunnen heuren dat ze oet Drenthe komt en goed heur best daon hebt um dat aof te ‘biet’n’.

Maor ik vun het hartstikke mooie daogen. Ik wil nog wel een maol. Ik heb een hiele vlot leerd. Oh ja, en EHBD betekent Eerste Hulp Bij Drents.