Strunen en kuiern in Annen

ANNEN - Steltlopen, hoepeln, dierengeluden raoden, raodsels oplössen, lustern naor meziek en een verhaol; het kun allemaol tiedens de ‘familie-wandeltocht’, die de vrijwilligers van het Huus van de Taol in de gemeente Aa en Hunze zundag in Annen organiseerd hadden. 

Maor lèeifst 28 groepen, bestaonde oet kinder met heur olders en/of opa’s en oma’s, startten vanaof de brink getooid met een knapzak vol lekkers, om een wandeling te maoken waorbij ze onderweg op verschillende plekken vermaokt wörden met oeteenlopende activiteiten.

Vanzölfsprekend stun de Drèentse taol dizze middag in het volle licht. De Drèentse taol is een gemeenschappelijk bezit, waor het Huus van de Taol met zien medewarkers en een groot aantal vrijwilligers zunig op bennen en hier tiedens diverse gelegenheden in de provincie aandacht an besteden.

De kinder, heur olders en grootolders, maor ok de vrijwilligers hadden een mooie middag, die op de brink aofsloten wör met een ijsco veur de kleinen en koffie en thee met cake veur de groten. Nat en dreug wör dizze middag sponsord deur een aantal ondernemers oet het dörp.

Met een heuileboel neie en wellicht ok bekende Drèentse woorden in heur jasbuus gung elk weer op hoes an.