Bosschup an leerlingen van scholen: ‘Wees wies met Drèents’
AlgemeenRAOL – Wees wies met Drèents; dat was de bosschup die streektaolvrijwilliger Janny Bruins van het Huus van de Taol in Aa en Hunze har veur de leerlingen van groep 7b van de Jan Thiesschool in Raol. Het is Meertmaond-Streektaolmaond en daorum wordt, op alle scholen in de gemeente, deur slim veul vrijwilligers weer veurlezen in het Drèents.
Veur de dartien groepen van de Jan Thiesschool stunden vieftien vrijwilligers klaor um het Drèents te laoten heuren. Wetholder Richard Heling was ok even weerum op zien olde school en mug groep 7b veurlezen. Hij vertelde het verhaol van meester Jaap, die pesters op school leut vulen hoe het is um pest te worden. De leerlingen kunden het verhaol good volgen, zo bleek wel. Bij de vraog wie der nog Drèents prat, weurden der gien vingers opsteuken. Op de vraog of de olders dat deden, gungen der al een paor vingers umhoog. Een groot aantal vingers leut zeen dat opa en oma wél Drèents praot.
Janny Bruins nam daornao de tekst van het lied Op fietse van Skik met de kinder deur. De woorden buulzaand (mul zand) en iemenkörf (bijenkorf) kunden de leerlingen der nog wel oethaolen. Gruppe (grèens) weur wat lastiger. Zölf kwamen ze met woorden as moi (hoi), buus (broekzak) en stoet (brood). De groep barstte niet spontaon in zingen oet, maor bij de darde maol van het couplet weur deur goenend zachies metmompeld. Wetholder Heling kende de tekst wel. Volgens juf Sabine is zu’n eerste les Drèents toch wel een beetie spannend. Maor op de vraog of ze liever gungen reken dan een lessie Drèents volgen, was het antwoord dudelijk: dan toch liever Drèents. De juf beloofde dat ze laoter op de dag nog even Op fietse zulden zingen.
In de koffiekaomer van de Jan Thiesschool bleek dat de vrijwilligers allemaol geneuten hebt van ‘t veurlezen. “We verwaacht niet dat alle kinderen nou Drèents gaot praoten, maor sinds we met het Drèents veurlezen op de scholen bint begunt, is der toch meer begrip en waardering veur de streektaol ontstaon”, zeg streektaolvrijwilliger Bruins.
