Zeuven weken Streektaol in de supermarkt

GROL – De hoofdpries van Streektaol in de supermarkt is 30 december in buurtsuper Lekker Makkelijk in Grol overhandigd an Roely Sijbring.

Nao een hele felle stried van zeuven weken achterien, kwam Roely Sijbring as winnaor oet de bus. Elke week was der een weekwinnaor en elke week kuj een ciefer kriegen op het briefie, waorop ie de vertaoling schreven hadden van een Drentse zin. Smangs veul dat nog niet met. En bedenker Bertus Reinders hef bij het naokieken regelmaotig moeten lachen, maor ok goed begrepen dat een niet-Drent oes wel iens heel arg verkeerd begriepen kan.

Het Huus van de Taol zet zuch in veur de streektaol. Zij hebt dan ok graog metwarkt an dizze taolstried. Elke week weuren der priezies beschikbaor stelt en René en Mariska van Schooten, van de buurtsuper, meuken der dan met wat bosschuppen een hiel nuver pakket van. Saomen met streektaolambassadeur Jan Hartlief hebt ze de hoofdpries overhandigd.

Het gung der um heer de leste weken. Sommige dielnimmers waren slim fanatiek en as ze dan niet op een woord kommen kunnen, dan kwamen ze aanderdaogs gewoon weer. Van een kleine vieftig dielnimmers zaten de eerste tien ok stoef op mekaor wat puntenaantal angiet, want veur de rest was alles keurig op anderhalve meter vanzölf.

Al met al was het hiel succesvol. Mensen vraogt nou al wanneer het spel weer speult wordt. Daor zal toch even op wacht moeten worden, want der zat best veul tied in en der zit vanzölf ok nog wel wat kosten in. In elk geval was dit – in goed Drents – pilot-project goed lukt en zul dit ok wel wat kunnen wezen veur andere kleine supermarkten op het plattelaand.

Zodrao het allemaol weer kan, wult ze in Grol een aovend organiseren veur wie daor aordigheid an hef um met mekaor nog ies de zinnen bij de kop te pakken en te bekieken wat daorop allemaol as vertaolingen binnenkommen bint. Dat daor wat te lachen valt stiet wel vast. En een cursus Drentse Taol is meugelijk ok best handig.