Streektaolvrijwilligers Aa en Hunze pakt draod weer op

AA EN HUNZE - Nao een slim drok veurjaor en een rustige zunnige zummer bint de streektaolvrijwilligers van het Huus van de Taol in Aa en Hunze het seizoen 2023/2024 start.

Ofgelopen week verzörgden ze de eerste gezellige middag, waorop ze heur spel ‘Wel hef geliek’ speulden. Al een mooi vlottie daotums staot inmiddels in de agenda veur het speulen van dit spel bij verscheidene verenigings in oonze gemeente. Der kan een ‘Broescursus Drèents’ bij geven worden en kunt der gedichten veurdraogen worden en/of kan der luusterd worden naor een verhaol. De streektaolvrijwilligers bint te boeken bij streektaolambassadeur Jan Hartlief.

De succesvolle Streektaolstried wordt in 2024 speuld op vrijdagaovend 22 meert. In dizze ‘Meertmaond-Streektaolmaond, gaot ze netuurlijk net as aal jaor, op alle baosisscholen en een aantal kinderdagverblieven, veurlezen in oonze mooie Drèentse taol. De wandeling ‘Strunen en kuiern’ waor de eerste maol zu’n 150 deelnimmers an metdeden, wordt herhaold. Zundagmiddag 21 april kunt kinder, olders en grootolders een leuke Drèentse-doe-wandeling deur Anloo maoken.

Jan Hartlief hef te kennen geven dat hij nao zeuven jaor trouwe deenst an het eind van het seizoen 2023/2024 zien taok as streektaolambassadeur neer leggen wil. De vrijwilligers kiekt in Aa en Hunze oet of der nog een man of vrouw is met een groot Drèents hart die zien taoken as veurzitter over wil nimmen.

Ambassadeur Jan Hartlief is te bereiken via mail of tillefoon: jghartlief@ziggo.nl of 06-46325905.