Anja Wiechers-Smit oet Raol neie streektaolambasseur in Aa en Hunze
AlgemeenRAOL - Anja Wiechers-Smit oet Raol is de neie streektaolambasseur veur het Huus van de Taol in Aa en Hunze. As streektaolambassadeur zal ze der met een koppel vrijwilligers veur zörgen dat er streektaolactiviteiten in heur gemiente organiseerd wordt.
Anja Wiechers-Smit is geboren in Ieghaor: “Ik bin opgruid met het Drèents en vind het belangriek dat het beholden blef. Daorum bin ik al een jaor actief bij de streektaolvrijwilligers in Aa en Hunze en nim ik nou het streektaolambassadeurschap met veul plezeer over van Katrien Eggens.”
Wiechers-Smit woont al jaoren met heur gezin in Raol, warkt bij de Rabobank en zingt in heur vrije tied bij popkoor XING en bij het Eelder Bloemenkoor.
Renate Snoeijing, directeur van het Huus van de Taol: “Wij bint er slim wies met dat Anja zuch in de gemiente Aa en Hunze as streektaolambassadeur inzetten wil veur de Drèentse taol. Mooi um te zien dat het Drèents heur zo nao an het hart lig.”
Tiedens een feestelijke vergadering met de streektaolvrijwilligers van de gemiente Aa en Hunze nam Wiechers-Smit letterlijk het stokkie over: ze kreeg de gegraveerde bongel van de gemiente Aa en Hunze van heur veurganger Katrien Eggens.
Het Huus van de Taol bedankt Katrien Eggens veur heur inzet as streektaolambassadeur. Ze blef in de rol van streektaolvrijwilliger betrökken in de gemiente Aa en Hunze.
Het Huus van de Taol is de streektaolorganisatie die het Drèents anfietert met as doel um het een taol te laoten weden waor de gebroekers wies met bint en die deur niet-gebroekers waardeerd wordt.
