Katrien Eggens neie streektaolambassadeur veur het Huus van de Taol
AlgemeenAA EN HUNZE - Katrien Eggens is sinds dizze week streektaolambassadeur veur het Huus van de Taol. As streektaolambassadeur zal ze met een koppel vrijwilligers veur zörgen dat er streektaolactiviteiten in heur gemiente organiseerd wordt.
Eggens nemp in de gemiente Aa en Hunze het stokkie over van Jan Hartlief. Ze hef een eigen bedrief in training, coaching en interimmanagement. Ze gruide op Oringerveen op met het Drents, wat dan ok echt bij heur heurt: ,,Ik bin wies met het Drèents en vind het belangriek um het ere in te holden én um het deur te geven.”
Renate Snoeijing, directeur van het Huus van de Taol: ,,Katrien brengt een mooi netwark met. Daor kuw in heur gemiente goed op bouwen. Maor het belangriekste is vanzölf dat ze het hart veur het Drèents op de juuste stee hef zitten.”
Het Huus van de Taol bedankt Jan Hartlief veur alles wat e as streektaolambassadeur daon hef. Hartlief blef in de rol van streektaolvrijwilliger betrökken in Aa en Hunze.
Het Huus van de Taol is de streektaolorganisatie die het Drents anfietert met as doel um het een taol te laoten weden waor de gebroekers groots op bint en die de niet-gebroekers waardeert.
